کابل ټیلیګراف – ۲۰ وری ۱۴۰۴ لمریز کال
د امریکا متحده ایالاتونو د ټیکساس ایالت د هیوسټن ښار په پاول ریور منځني ښوونځي کې درې افغان نجونې په یوه دله ییز برید کې وهل شوي دي.
د اسلامي-امريکايي اړیکو شورا ویلي چې دغه پېښه د مارچ په درېیمه د یوې شل کسیزې ډلې لخوا ترسره شوې ده.
یادې شورا لخوا پرون په خپره شوې اعلامیې کې ویل شوي، برید کوونکو زدهکوونکو د افغان نجونو د زیانمنولو لپاره له پنسل څخه کار اخیستی دی.
د اسلامي-امريکايي اړیکو شورا ویلي چې یوه افغان زدهکوونکې دومره سخته وهل شوې وه چې څلور ورځې یې د ټیکساس ماشومانو روغتون کې تېرې کړې.
دې شورا د دغو نجونو له کورنیو نقل قول کړی چې برید کوونکو د ښوونځي د زدهکوونکو ترمنځ په عادي شخړو کې، د هویت په نه پېژندلو او د اسلامي حجاب له امله په تېروتنه سره پر افغان نجونو برید کړی دی.
د اسلامي-امريکايي اړیکو شورا د دغو نجونو د خوندیتوب، د پېښې په اړه د خپلواکو څېړنو او د عاملینو او ښکېلو کسانو، په شمول د ښوونځي هغو کارکوونکو چې په خپلو دندو کې پاتې راغلي، د محاکمې غوښتنه کړې ده.
په اعلامیه کې راغلي چې د پاول ریور منځني ښوونځي د قربانیانو د کورنیو او د هغوی د استازو پرلهپسې غوښتنو ته تر اوسه هیڅ ډول ځواب نه دی ویلی.
