کابل ټیلیګراف – ۳۱ وری ۱۴۰۴ لمریز کال
ایراني رسنیو راپور ورکړی چې ۱۴۰۲ لمریز کال کې د افغانستان او ایران تر منځ د توکو د لېږد کچه ۶۰ زره ټنو ته رسېدلې ده.
دغه توکي د خواف–هرات رېل پټلۍ له لارې لېږدول شوي دي.
د افغانستان او ایران تر منځ د رېل پټلۍ له لارې د توکو لېږد په وروستیو کلونو کې پاموړ زیاتوالی موندلی، چې دا د دواړو هېوادونو ترمنځ د اقتصادي همکاریو پراخېدو او د ترانزیټي لارې د اغېزناکې کارونې ښکارندویي کوي.
په ځانګړي ډول د خواف–هرات رېل پټلۍ د پرانیستې وروسته، د بار وړلو کچه ډېره لوړه شوې، چې نه یوازې د سوداګرۍ بهیر چټکوي، بلکې د سیمې د اقتصادي اړیکو د پیاوړتیا لپاره هم مهم ګڼل کېږي.
د افغانستان د رېل پټلۍ د پراختیا کنسرسیوم رییس، مصطفی رضایي ویلي، ۲۰ زره ټنه دغه توکي د شمتیغ رېل پټلۍ له لارې لېږدول شوي، چې ډېری یې د اورګاډي پټلۍ د جوړولو اړوند وسایل وو.
د یادونې وړ ده چې دا رېل پټلۍ د افغانستان د رېل پټلۍ د پراختیا یوه مهمه برخه ګڼل کېږي او د هېواد د زېربناوو د پرمختګ لپاره یو ستر ګام بلل کېږي.
