کابل ټیلیګراف – ۱۰ غویی ۱۴۰۴ لمریز کال
د فلسطین د روغتیا وزارت وایي، د نن سهار راهیسې د غزې په بېلا بېلو سیمو د اسرائيلو په بریدونو کې ۱۶ فلسطیني وګړي وژل شوي دي.
دغه وزارت زیاتوي، له وژل شویو ۱۶ فلسطیني وګړو څخه یې ۱۲ د غزې په مرکزي برخه کې وژل شوي دي.
په ورته وخت کې د اسرائیلي پوځيانو له خوا د لويديځې غاړې پر بېلابېلو سيمو بريدونه لا هم روان دي.
اسرائیلي پوځیانو د رام الله په شمال لويديځ کې د «عاروره» کلي، د نابلس په جنوب کې د «قريوت» کلي او د لويديځې غاړې نورو سيمو باندې بریدونه او ډزې کړي.
فلسطيني سرچينو د جنين په ختيځ کې د «ديرابوضعيف» کلي څخه د دوو ځوانانو د نيولو او په طولکرم کې د يوه کس د ټپي کېدو خبر ورکړی دی.
