کابل ټیلیګراف – ۲۳ غویی ۱۴۰۴ لمریز کال
د پاکستان د بهرنیو چارو وزیر ویلي چې په کشمیر کې د اوبو د ستونزې نه حل کېدل کولای شي د اسلامآباد او ډیلي ترمنځ د اوربند لپاره ګواښ وي.
د پاکستان د بهرنیو چارو وزیر محمد اسحاق دار د هند او پاکستان ترمنځ د وروستي کړکېچ په اړه ویلي چې اسلامآباد د هند د بریدونو وروسته له ځان څخه د دفاع پرته بله لاره نه درلوده.
هغه ټینګار کړی چې د اټمي انتخاب هیڅکله پر میز نه و.
د پاکستان د بهرنیو چارو وزیر ویلي چې له هند سره اوږدمهاله خبرې اترې لا پای ته نه دي رسېدلې او موږ هیلهمن یو چې منطق به په دې خبرو اترو حاکم شي.
اسحاق دار یو ځل بیا ټینګار کړی چې پاکستان د تېرې اپریل میاشتې په برید کې چې په کشمیر کې پر سیلانیانو شوی و، لاس نه درلود او اسلامآباد ترهګري په ټولو بڼو غندي.
هغه ویلي چې د دواړو هیوادونو ترمنځ اوربند تر هغې په خطر کې دی تر څو چې په کشمیر کې د اوبو ستونزې ته حل لاره ونه موندل شي او د دې ستونزې په حل کې پاتې راتلل به د جګړې د عمل په څېر وي.
دا په داسې حال کې ده چې د پاکستان پوځ نن د هند د بریدونو د قربانیانو شمېر اعلان کړ.
د هند د توغندیزو بریدونو په شپه کې چې د پاکستان پر څو نقطو وشول، څلوېښت ملکي وګړي ووژل شول او د پاکستان د غبرګون وروسته، د پاکستان د امنیتي ځواکونو ۱۱ منسوبین وژل شوي.
