کابل ټیلیګراف – ۲۸ غبرګولي ۱۴۰۴ لمریز کال
د ټرانسپورټ وزارت سرپرست، حمیدالله اخندزاده د ترکمنستان له سفیر، خواجه عوضوف سره په کابل کې کتلي.
د ټرانسپورټ او هوايي چلند وزارت په یوه خبرپاڼه کې ویلي، نن (چهارشنبه) په دغه کتنه کې د ټرانسپورتي همکاریو، د سوداګریزو توکو د لېږد زیاتوالي او افغان موټرچلوونکو ته د ویزو د ورکړې د اسانتیاو پر موضوعاتو خبرې وشوې.
د ټرانسپورټ وزارت سرپرست وویل، اوس د کابل او عشقآباد ترمنځ د همکاریو پراخولو لپاره غوره فرصت برابر دی.
د ترکمنستان سفیر هم ډاډ ورکړ چې هېواد یې غواړي له افغانستان سره، په ځانګړې توګه د ټرانسپورټ په برخه کې، خپلې اړیکې نورې هم پیاوړې کړي.
