کابل ټیلیګراف – ۹ چنګاښ ۱۴۰۴ لمریز کال
د خوست سیمهییز مسؤولین وایي چې د دغه ولایت په ځاځي میدان ولسوالۍ کې د یو کور د چت لوېدو له امله یوې ښځې ژوند له لاسه ورکړی او درې نور ټپيان شوي دي.
خوست کې د طالبانو د والي ویاند مستغفر ګربز ویلي چې دا پېښه نن مازدیګر شاوخوا پنځه بجې د یادې ولسوالۍ د ایسار په کلي کې رامنځته شوې ده.
نوموړي زیاته کړه، پېښه د طوفان او تیز باران له امله رامنځته شوې، چې په پایله کې یې یوه ۶۴ کلنه مېرمن مړه شوې او درې تنه نور – چې دوه ماشومان هم پکې شامل دي – ټپيان شوي دي.
د ګربز په وینا، ټپیان روغتون ته د درملنې لپاره انتقال شوي، او روغتیايي حالت یې د ډاډ وړ بلل شوی دی.
