کابل ټیلیګراف – ۱۰ چنګاښ ۱۴۰۴ لمریز کال
د اسرائیلي ځواکونو لخوا په غزه کې سخت بمباري روانه ده چې د تیرو ۲۴ ساعتونو پر مهال ۹۵ فلسطینیان وژل شوي دي.
د عربي رسنیو د راپورونو له مخې، د اسرائیلي ځواکونو لخوا د دوشنبې په ورځ په غزه کې په ډیری سیمو سخت بمباري وشوه چې په پایله کې یې لږ تر لږه ۹۵ فلسطینیان ووژل شول.
په وژل شویو کسانو کې هغه کسان هم شامل دي چې د مرستو ترلاسه کولو لپاره ولاړ وو، په داسې حال کې چې یو له خلکو ډک روغتون هم په نښه شو.
د راپور له مخې، د دوشنبې په ورځ په شوو بریدونو کې یوازې په غزه ښار او شمالي سیمو کې ۶۲ فلسطینیان ووژل شول.
سربیره پردې، د اسرائیل سمندري ځواکونو د غزه ښار په ساحلي سیمه کې یوه کافي هم په نښه کړه، په دې برید کې له ۳۰ څخه زیات کسان ووژل شول او لسګونه نور ټپیان شول.
په وژل شویو کسانو کې ښځې، ماشومان او خبریالان هم شامل دي چې په دې کافي کې راټول شوي وو.
د اسرائیلي پوځ دا بریدونه په غزه کې روان بشري بحران نور هم جدي کوي.
د ۲۰۲۳ کال د اکتوبر له ۷مې نیټې راهیسې د اسرائیلي پوځ لخوا په غزه باندې بې رحمه بریدونه روان دي چې تر اوسه یې د ښځو او ماشومانو په ګډون له ۵۶ زرو څخه زیات فلسطینیان وژل شوي دي.
