کابل ټیلیګراف – ۱۵ چنګاښ ۱۴۰۴ لمریز کال
د امریکا د ټیکساس ایالت په مرکزي سیمو کې سخت بارانونه او تر ټولو ناوړه سېلابي وضعیت رامنځته شوی، چې په بېلابېلو پېښو کې د وژل شویو کسانو شمېر ۴۸ ته رسېدلی دی.
د خبري اژانسونو په وینا، په وژل شویو کسانو کې ۱۵ ماشومان هم شامل دي، په داسې حال کې چې څو نجونې لا هم لادرکه دي.
د سېلاب له امله په بېلابېلو سیمو کې څو فوټه اوبه راټولې شوې، کورونه او موټرونه په اوبو کې ډوب شوي، او د ونو د پرېوتو له امله لارې بندې شوې دي.
د امریکايي رسنیو په وینا، چارواکو ویلي چې په ۹۰ دقیقو کې د ۲۰ تر ۲۶ فوټو اوبو راټولېدو له امله زیانونه رامنځته شوي دي.
د امریکايي رسنیو په حواله، له متاثره سیمو څخه د چورلکو په مرسته ۸۵۰ کسان ژغورل شوي دي.
له بلې خوا، چارواکو د نورو بارانونو او په پایله کې یې په سیندونو کې د سېلابونو وړاندوینه کړې او ویلي یې دي چې دا وضعیت د اقلیمي بدلونونو یوه نښه ده.
د ایالت والي ګریګ ایبټ د بیړني حالت اعلان څو نورو سیمو ته پراخ کړی او د ولسمشر ټرمپ څخه یې د نورې فدرالي مرستې غوښتنه کړې ده.
