کابل ټیلیګراف – ۲ وږی ۱۴۰۴ لمریزی کال
د طالبانو د پنجشیر والي، محمد آغا حکیم په دغه ولایت کې د نویو کانونو تثبیت د اقتصادي خودکفایۍ او کارموندنې په لور یو مهم ګام بللی او د کانونو وزارت او محلي ادارې د ګډو هڅو ستاینه کړې ده.
د معلوماتو له مخې؛ د دغه ولایت په پریان ولسوالۍ کې ۲۵۰ نوې د زمردو کانونو ساحې په نښه شوي او په نورو څو ولسوالیو کې د بېروج او سربو کانونه هم تثبیت شوي دي.
د پنجشیر د طالبانو والي وایي، دا پروژې کولای شي د سلګونو کسانو لپاره د کار زمینه برابره کړي او د پایښت لرونکي اقتصادي پرمختګ پیاوړتیا وکړي.
هغه وايي، د کانونو د تثبیت او پراختیا بهیر به دوام وکړي او محلي حکومت د خلکو د هوساینې لپاره د طبیعي سرچینو له مؤثره کارونې څخه ژمن دی.
خو یو شمېر اقتصادي کارپوهان طالبان د کانونو د استخراج په برخه کې پر بې پروایۍ تورنوي او وایي چې په هېواد کې په غیر مسلکي توګه د کانونو استخراج روان دی او ډیره برخه قیمتي ډبرې په ارزانه بیه پاکستان ته قاچاق کیږي چې د هېواد اقتصاد ته لوی زیان دی.
دوی په دې باور دي چې په دغه ډول د کانونو استخراج نه یوازې دا چې د هېواد اقتصاد ته ګټه نه لري بلکې د هېواد له میلي شتمنیو سره ستر او نه هیریدونکی خیانت هم دی.
