کابل ټیلیګراف – ۹ زمری ۱۴۰۴ لمریز کال
د بریتانیا د احصایې ادارې (او این ایس) د خپرو شویو معلوماتو له مخې، په ۲۰۲۴م کال کې محمد په انګلستان او ویلز کې د نویو زیږیدلو ماشومانو لپاره تر ټولو زیات غوره شوی نوم دی.
په ۲۰۲۳ کال کې هم محمد تر ټولو مشهور نوم و.
دا نوم له ۲۰۱۶ کال راهیسې د لسو غوره نومونو په لیست کې دی.
محمد په ۲۰۲۲ کال کې دویم او په ۲۰۲۱ کال کې پنځم مشهور نوم و.
د بریتانوي رسنیو په وینا، دا کړنه په بریتانیا کې د مسلمانانو د نفوس زیاتوالی ښيي، ځکه مسلمانان د اسلامي دودونو له مخې خپلو ماشومانو ته نومونه ټاکي.
د راپور له مخې، نوح دویم او اولیور نوم درېیم ځای لري.
د نجونو لپاره اولیویا او امیلیا نومونه پرلهپسې درېیم کال تر ټولو مشهور نومونه پاتې شوي دي.
شاھي نومونو لکه جارج (شپږم ځای) او ولیم (۲۷م ځای) په شهرت کې د پام وړ کمښت راغلی دی.
