کابل ټیلیګراف ۷وږی ۱۴۰۴ لمریز کال
د پاکستان جیونیوز تلویزیون را پور وکړی، چې د پاکستاني طالبانو د تحریک د بې وسلې کولو او دوی د افغانستان غزني ولایت کې د ځای پر ځای کولو په موخه یوه خلیجي هېواد طالبانو ته ۶ میلیونه ډالر ورکړي دي.
دغه رسنۍ وایي، دغه پیسې د یوې ازماېښتي پروژې په توګه طالبانو ته ورکړل شوي و، خو طالبانو تر دې دمه د دغه پیسو د مصرف په اړه هیڅ اسناد نه دي وړاندې کړي.
جیوز نیوز لیکلي: غزني ولایت ته د پاکستاني طالبانو تحریک (ټي ټي پي) د لېږدولو لپاره يو خليجي هېواد لخوا ورکړل شویو ۶ میلیونه ډالر د مصرف په اړه له افغان طالبانو سختې پوښتنې کيږي، ځکه چې په دې اړه هيڅ قوي مالي ريکارډ نه دی وړاندې شوی او نه دا ویل شوي چې دا پيسې څنګه او چېرته مصرف شوې، او کوم خلک غزني ته لېږدول شوي دي؟
د یادې رسنۍ د خبر له مخې؛ ټاکل شوې وه، چې د یادو ډالرو په مصرف کولو سره نږدې دوه زره کورنۍ په غزني کې میشتې شي، خو طالبانو پرته له دې چې د مخکینو پیسو حساب ورکړي، له یاد خلیجي هېواد څخه یې د نورو پیسو د ورکړې غوښتنه کړې.
د دې خبر له مخې؛ یاد خلیجي هېواد چې نوم یې نه دی ذکر شوی، له طالبانو غوښتي، چې د مخکینیو پیسو حساب باید ورکړل شي او له هغې وروسته به د راتلوونکې پروژې په اړه پرېکړه وکړي.
د جیونیوز د يوې سرچينې په وينا، افغان طالبان تر اوسه د غوښتل شويو اسنادو په وړاندې کولو کې پاتې راغلي دي او له همدې امله یاد خلیج هېواد له طالبانو سخت خفه دی.
جیونیوز لیکلي: له دې وړاندې پاکستان هم د دې پروژې د مالي مرستې لپاره لېوالتيا ښودلې وه او نږدې ۳۰ ميليارده روپۍ ورکولو ته يې اشاره کړې وه، خو د افغان مشرتابه په اړه د ژورې بې باورۍ له امله دا هڅه مخکې ونه لاړه.
د یادې رسنۍ د معلوماتو له مخې؛ دا بې باوري هغه وخت نوره هم قوي شوه کله چې د لشکر اسلام وسله وال، چې په ۲۰۲۱ کال کې يې ادعا کړې وه چې په ارزګان کې مېشت کړای شوي دي، خو دا خلک بيا په تيراه وادي کې راڅرګند شول.
جیونیوز د يوه پاکستاني چارواکي په وينا لیکلي: دوى حيران دي چې ولې ټول غوښتل شوي کسان د افغان طالبانو په حکومت کې شامل دي.
