کابل ټیلیګراف ۷وږی ۱۴۰۴ لمریز کال
د ایران د بهرنیو چارو وزیر سید عباس عراقچي ویلي، که لویدیځ هېوادونه جدي او نیک نیت وښيي، ایران د اټومي پروګرام په اړه د خبرو اترو بیا پیلولو ته چمتو دی.
د ایران بهرنیو چارو وزیر عباس عراقچي د اټومي پروګرام په اړه د خبرو اترو په تړاو د اروپایي اتحادیې د بهرنۍ پالیسۍ مشرې کاجاکالاس ته لیک لیږلی دی.
عباس عراقچي په لیک کې لیکلي: د ایران لخوا د خبرو اترو بیا پیلول په دې پورې اړه لري چې مقابل لوري جدي او نیک نیت وښيي او داسې ګامونه ونه اخلي چې د بریالیتوب امکانات زیانمن کړي.
د ایران دا دریځ په داسې وخت کې راغلی کله چې بریتانیا، فرانسې او جرمني پر ایران د ملګرو ملتونو بندیزونو بیا فعالولو لپاره رسمي پروسه پیل کړې ده.
د دې درې واړو اروپايي هېوادونو د ملګرو ملتونو امنیت شورا ته په لیک کې ویلي چې ایران د اټومي پروګرام په اړه خپلو ژمنو باندې عمل نه دی کړی او دغه هېواد د ۲۰۱۵ کال اټومي تړون لاندې خپلو مسؤلیتونو څخه سرغړونه کړې ده.
د دې درې واړو هېوادونو په وینا، دوی د بندیزونو د “اسنیپ بیک” میکانیزم فعالوي، چې له مخې به یې د بندیزونو بیا فعالولو پروسه په ۳۰ ورځو کې بشپړه شي.
د یادونې وړده، چې په تېرو ورځو کې ایران د درې اروپايي هېوادونو سره د نوي اټومي تړون په اړه د خبرو اترو څو پړاوونه هم ترسره کړي دي.
