کابل ټیلیګراف ۷وږی ۱۴۰۴ لمریز کال
د فلسطین د روغتیا وزارت وایي، د پنجشنبې له سهار راهیسې تر اوسه د اسرائیلي پوځ په بریدونو کې ۶۱ فلسطینیان وژل شوي دي.
د را پور له مخې؛ په وژل شویو کې ۱۹ هغه کسان هم شامل دي چې د مرستو تر لاسه کولو په موخه ولاړ و.
د را پور له مخې؛ اسرائیلو د جبالیه د یوه ښوونځي سره نږدې برید کې ۵ کسان وژلي دي.
د غزې د روغتیا وزارت په وینا، په غزه کې د لوږې شدت له امله د دوه ماشومانو په ګډون ۴ نور فلسطینیان مړه شوي دي.
د یادو کسانو په مړینې سره د لوږې له امله په فلسطین کې د مړو شویو کسانو شمېر ۳۱۷ تنو ته ورسېد.
بلخوا، اسرائیلي پوځ په اشغال شوي لوېدیځه تبه کې حملې کړي او ۱۲ کسان یې نیولي، چې په کې خبریالان، فعالان او خوشي شوي بندیان شامل دي.
په ورته وخت کې د ملګرو ملتونو سلګونو کارکوونکو د بشري حقونو کمیسیون مشر څخه په یوه لیک کې غوښتنه کړې چې په غزه کې د قتل عام او نسل وژنه وبولي.
له دې سربېره، د اسټرالیا کرکټر عثمان خواجه د اسټرالیا له لومړي وزیر انتوني البانیز سره لیدنه کې پر اسرائیل او نتنیاهو یې د بندیزونو غوښتنه کړې.
