کابل ټیلیګراف ۷وږی ۱۴۰۴ لمریز کال
وروسته له هغې چې د فیډرل ریزور والۍ لیزا کک د امریکا متحده ایالاتونو ولسمشر لخوا له دندې ګوښه شوه، هغې په محکمه کې په ډونالډ ټرمپ د هغې د ګوښه کېدو پرېکړې له امله عریضه کړې.
هغې ویلي، فیډرل ریزو یوه خپلواکه اداره ده، د امریکا ولسمشردا صلاحیت نلري، چې له سنګین فساد او له اداري چارو د پراخه سرغړونو پرته هغه له دندې یې ګوښه کړي.
خو د امریکا ولسمشر ډونالډ ټرمپ په یوه لیک کې د لیزا کک د ګوښه کېدو اعلان کې ویلي وو چې کک په ۲۰۲۱ کال کې د استوګنې قرضو په معاملو کې په پراخه کچه درغلي کړې، نو له دې امله هغه د یادې دندې لپاره وړ نده.
کک دا تورونه بې بنسټه بللي او ویلي یې دي چې د ولسمشر لخوا د ګوښه کېدو هڅه غیر قانوني بڼه لري.
دا د امریکا په تاریخ کې لومړی ځل دی، چې یو ولسمشر په مستقیم ډول د فیډرل ریزو والي له دندې ګوښه کوي.
لیزا کک په ۲۰۲۲ کال کې د پخواني ولسمشر جو بایډن لخوا په دې دنده ګمارل شوې وه.
هغه لومړنۍ تورپوستې ښځه ده چې د والیانو د بورډ غړي په توګه ټاکل شوې ده.
