کابل ټیلیګراف ۷وږی ۱۴۰۴ لمریز کال
پاکستاني چارواکي وايي په تېرو ۷ ورځو کې د سېلابونو د ګواښ له امله په پنجاب ایالت کې له یو میلیون زیات کسان له خپلو کورونو ایستل شوي دي.
دا سېلابونه د موسمي ورښتونو سربېره وروسته له هغې زیات شول، چې هند د درېیو ډکو بندونو اوبه پر پاکستان ورخوشې کړې او دغلته یې له ۱۴۰۰ زیات کلي تر اوسه اوبو لاندې کړي دي.
هند دا بندونه په اپرېل کې پاکستان سره د شخړې له امله تړلي وو، خو د ورخوشې کېدو وړاندې یې د «بشردوستانه ګام» په توګه پاکستان ته خبرداری ورکړی وو.
پاکستاني چارواکو په پنجاب کې روان سېلابونه او د کلیو لاندې کول تېرو څلورو لسیزو کې بې ساري ګڼلي دي او د خلکو د خوندیتوب په چارو کې له ستونزو سره مخ دي.
پنجاب کې د سېلابونو له امله د مرګ ژوبلې دقیق ارقام نشته، خو هند کې روانه میاشت سېلابونو ۶۰ کسان وژلي او پاکستان کې بیا له جون راهیسې لږ تر لږه ۸۱۹ کسان وژلي دي.
پرون هم د پاکستان لومړی وزیر، شهباز شریف او د پنجاب اعلی وزیره، مریم نواز شریف د هوا له لارې پر هغو سیمو ګزمې ووهلې چې د هند اوبو لاندې کړي دي.
