کابل ټیلیګراف ۸وږی ۱۴۰۴ لمریز کال
طالب چارواکي وایي په هرات ښار کې د ترافیکي ګڼه ګوڼې د کمولو او ښاري ښکلا د زیاتولو په موخه تر ځمکې لاندې د یوه سړک د جوړولو چارې پیل کړې.
هرات کې د طالبانو والي شیخ مولانا نور احمد اسلامجار په دې اړه جوړو شوو مراسمو کې وویل چې، دغه پروژه د هرات ښار د ترافیکي ګڼه ګوڼې او د اوسېدونکو د ستونزو کمولو په موخه پلې کېږي.
نوموړی زیاتوي تر ځمکې لاندې یاد سړک د هرات ښار په دویمه او درېیمه ناحیه کې د ۶۶۰ مترو په اوږدوالي او ۸ مترو په سور سره د ۶۵ میلیونو افغانیو په لګښت د ښاروالۍ له پراختیايي بودجې جوړېږي.
د نوموړي په وینا، ټاکل شوې یاده پروژه په څلورو میاشتو کې بشپړه شي.
همداراز د یادې پروژې انجینر ډاډ ورکړی چې پروژه به د نړیوالو معیارونو پر بنسټ په ټاکلي وخت کې بشپړه شي.
د هرات اوسېدونکو د دې پروژې هرکلی کړی او دا یې د ترافیکي ګڼه ګوڼې د کمېدو او د سړکونو د خوندیتوب په برخه کې اغېزمن ګام بللی دی.
