کابل ټیلیګراف ۹وږی ۱۴۰۴ لمریز کال
د سولې په اړه د وروستي خپاره شوي راپور له مخې، ایسلینډ د ۲۰۲۵ کال لپاره د نړۍ تر ټولو سوله ایز هېواد اعلان شوی دی.
دا راپور د اقتصاد او سولې انسټیټیوټ (IEP) لخوا د نړیوال سولې شاخص (Global Peace Index) په نوم چمتو کیږي، چې په کې ۱۶۳ هېوادونه او سیمې د بېلابېلو عواملو پر بنسټ لکه ټولنیز امنیت، کورني او بهرني شخړې، او پوځي ځواک کچه له مخې ارزول کیږي.
ایسلینډ نه یوازې د سوله ایزو هېوادونو په لیست کې لومړی دی، بلکې د نړیوالې خوښۍ راپور (World Happiness Report) له مخې د نړۍ د خوښو هېوادونو په لیست کې درېیم ځای لري.
د خپل زړه راښکونکي طبیعي ښکلا، اورغورځونکو غرونو، او ارامو منظرو له امله دا هېواد د سیلانیانو لپاره هم ډېر جذاب دی.
د نړیوال سولې شاخص د راپور له مخې، د ایسلینډ وروسته آیرلینډ، نیوزیلینډ، آسټریا، او سویس بالترتیب د نړۍ د پنځو تر ټولو سوله ایزو هېوادونو په لیست کې دي.
راپور وايي، د سوله ایزو ټولنو لپاره مثبتې سولې بنسټیز رول لري، چې دا د بهتر اقتصاد او ټولنیزې سوکالۍ لامل کیږي.
راپور زیاتوي، سږ کال د سوله ایزو هېوادونو په لیست کې د روسيې په کچه کې د پام وړ کموالی راغلی او دا هېواد په ۱۶۳م نمبر دی، په داسې حال کې چې اوکراین په ۱۶۲م نمبر ده.
متحده ایالات هم په دې لیست کې په ۱۲۸م نمبر دی، چې لویه وجه یې د هغه پوځي بودیجه او پوځي ځواک دی.
متحده ایالات په دې لیست کې له بنګله دېش، یوګانډا، او هندوراس څخه هم ټیټ دی.
په اروپا کې فرانسې ته تر ټولو زیات پوځي هېواد ویل شوی، په مرکزي او جنوبي امریکا کې کاناډا او کوسټاریکا تر ټولو سوله ایز هېوادونه اعلان شوي، او په افریقا کې ماریشس، بوټسوانا، او نامیبیا تر ټولو سوله ایز پاتې دي.
په دې لیست کې افغانستان ۱۵۸، پاکستان ۱۴۴ او ایران ۱۲۲م مقام کې دي.
