کابل ټیلیګراف ۹وږی ۱۴۰۴ لمریز کال
په جنوبي کوریا کې د هولوګرام پولیسو د ګمارنې تجربې د مثبتو پایلو سره په جرمونو کې د پام وړ کموالی را منځته کړی دی.
دا په اصل کې د پولیس افسر درې اړخیزه پروجیکشن دی، چې په عامه ځایونو کې نصب کیږي، ترڅو وګړي ځان خوندي احساس کړي او پر مجرمانو رواني فشار واچول شي.
د دې هولوګرامونو سره د مصنوعي ځیرکتیا (AI) پر بنسټ کیمرې نصب دي، چې د سیمې څارنه کوي، او ورسره په واټن کې اصلي پولیس افسران هم هغه ځایونه څاري چیرې چې دا پروجیکشنونه لګول شوي دي.
د پولیس افسر کیم هیون دون په وینا، په هغو سیمو کې چې دا هولوګرامونه
تعینات شوي، هلته د جرمونو کچه شاوخوا ۲۲ فیصده راټیټه شوې، په ځانګړي ډول په ناڅاپي شخړو او د نشې په حالت کې د تاوتریخوالي په جرمونو کې څرګند کموالی راغلی دی.
د دې هولوګرامونو له لارې ولس ته ثبت شوي پیغامونه هم اورول کیږي، لکه “دلته پولیس شتون لري، مهرباني وکړئ قانون مراعات کړئ.”
د سیول ښاریانو ویلي، که څه هم دا پولیس افسران اصلي نه دي، خو د دوی شتون داسې احساس ورکوي لکه اصلي پولیس هلته ولاړ وي، ځکه کیمرې په دوامداره توګه فعالې وي او نږدې اصلي پولیس افسران هم په چمتووالي کې وي.
د پولیس چارواکو په وینا، دا پروژه بریالۍ ثابت شوې او ژر به د ښار په نورو ځایونو کې هم د هولوګرام پولیس تعیناتولو په اړه غور وشي.
