کابل ټیلیګراف – ۹ وږی ۱۴۰۴ لمریز کال
یو شمېر کسان وایي، د طالبانو د عدلیې وزیر عبدالحکیم شرعي له دوی سره پخوانۍ شخصي عقدې پالي، په خوست کې هم یو شمېر قومي مشران د نوموړي د سرزورو کړنو په اړه څو ځلې غونډې کړي، او ځینو نورو بیا په ستره محکمه کې پر شرعي عریضه کړې، څو د شرعي له لوري ورسره د ترسره شویو غیرقانوني کړنو په اړه یې غږ واورېدل شي.
عبدالحکیم شرعي څوک دی؟
مولوي عبدالحکیم شرعي صاحب، د دین محمد زوی او د باز محمد لمسی، په ۱۳۴۰ هجري لمریز کال د خوست ولایت د لکڼو قوم د ایوبخېلو په کلي کې زېږېدلی دی.
لومړنۍ زدهکړې یې د ظاهرشاه د واکمنۍ په وروستیو کلونو کې د لکڼو په لېسه کې کړې او په ۱۳۵۶ هجري لمریز کال کې د خوست ولایت په یوې ځایي مدرسې فیضانالعلوم لکڼو کې یې له ځایي علماوو څخه دیني زدهکړې پیل کړې، او په ۱۳۵۷ کال کې له ټولې کورنۍ سره پاکستان ته ولاړ.
عبدالحکیم شرعي د برهان الدین رباني د حکومت په دوره کې په اهل الحل والعقد شوریٰ کې د خپلې سیمې د خلکو لهخوا وکیل وټاکل شو، او د طالبانو په تېره دوره کې لومړی د زابل ولایت والي وټاکل شو، له هغه وروسته د طالبانو د مشر له لوري د زغرهوالې لوا د مسئول په توګه موظف شو، بیا د میدان وردګ ولایت د والي په توګه وټاکل شو، بیا د عدلیې وزارت د مالي او اداري معین په توګه یې وګمارل شو.
هغه د پخواني حکومت پر مهال زنداني او دوه کاله یې په د بګرام په زندان کې تیر کړي دي او په ۱۴۰۰ کال پر افغانستان کې د طالبانو له بیا ځلې واکمنۍ را وروسته د طالبانو د عدلیې وزیر په توګه وګمارل شو او تر نن ورځې د دغه وزارت چارې پر مخ وړي.
خو ځینو کسانو کابل ټیلیګراف سره په خبرو کې ویلي، له هغې ورځې چې شرعي پر دغه دنده ګمارل شو، خپلې سرې، غیرقانوني اقدامات کوي او ان په ځینو مواردو کې د خوست ولایت اوسېدونکو سره پخوانۍ شخصي عقدې پالي.
خلک د شرعي له خپلو سرو کړونو په تنګ راغلي
د خوست ولایت یو اوسېدونکی چې نه غواړي نوم یې خپور شي، کابل ټیلیګراف ته وویل، د دوی کورنۍ د شرعي سره په دغه ولایت کې د ځمکو پر سر پخوانۍ شخړه لري خو دی چې کله وزیر شو نور پر دوی بېلابېل ډول فشارونه راوستل خو دوی لا هم ورته نه دي تسلیم شوي.
دی وایي، دا فشارونه تر دې حده را ورسېدل چې شرعي له لوري د دوی د کورنۍ یوه غړی په کابل کې اونیول شو او په میاشتو میاشتو په زندان کې واچول شو.
هغه وایي چې شرعي تل له خوستیانو سره شخصي عقدې پاللې دي او د ټولو اصولو خلاف کړنې ترسره کوي.
یوه بله سرچینه هم وایي: «د طالبانو د عدلیې وزیر، زما له پلار سره په خوست ښار کې د یوه مارکیټ پر سر د طالبانو په پخوانۍ دوره کې لانجه درلوده، بیا زموږ پلار وګټله، وروسته د طالبانو نظام ړنګ شو اوس چې بیا طالبانو راغلل، له موږ سره د عدلیې وزیر شخصي دښمنۍ را اخیستې ده.»
هغه وایي چې اوس مهال د عدلیې وزیر د یاد مارکیټ ځمکه دولتي تثبیت کړې او امر یې کړی چې باید مارکیټ ونړول شي.
دی اویي چې ټول خوستوال په دې خبر چې هغه له خلکو سره شخصي عقدې پالي.
په کابل کې هم یوه سرچینه وایي چې شرعي د عدالیې وزارت له کارونو پرته د نورو وزارتونو په چارو کې هم لاسوهنې کوي.
دی هم وایي: «په وزیرانو کې د شرعي نوم لګیږي چې چاته زنګ ووهي تر وزارته راشه، نور نفس یې ووځي او دا ویره ورسره وي که هلته ورشم زنداني به مې کړي، زور او زیاتی به راسره وکړي.»
هغه زیاتوي چې د عدلیې وزیر باید خپل مقام ته په کتلو سره په هماغه ډول له خلکو سره چلند وکړي.
ځینو ستره محکمه کې پر شرعي عریضه کړې
یوه باوري سرچینه وایي چې د دغو کړنو وروسته په وار وار د خوست قومي مشرانو ناستې او غونډې کړي ترڅو پر شرعي فشار راوړي چې د خپلو دغو غیر قانوني کړنو تیر شي.
دغو قومي مشرانو دغه راز ویلي که چېرې یې دا کړنې دوام وکړي نو دوی د طالبانو لوړو پوړو چارو ته خپل غږ ورسوي.
دغه راز ځینې کسانو په ټولنیزو پاڼو کې د عدالت غوښتنې غږ پورته کړی او شرعي پر وړاندې یې ځینې هشتکونه کارولي دي.
په همدې حال کې کابل ټیلیګراف یوه عرض پاڼه هم ترلاسه کړې ده چې ځینو خوستوال پر شرعي ستره محکمه کې عریضه کړې ده او په دغه عریضه کې د هغو مواردو په اړه د عدالت غوښتنه شوې ده چې د شرعي له لوري د دوی د کورنۍ سره بېعدالتۍ شوې دي.
د معلوماتو له مخې، دغه عرض پاڼه په ستره محکمه کې ثبت شوي او په اړه به یې اقدام وشي.
د عبدالحکیم شرعي د ځینو نورو غیرقانوني کړنو بیلګې
دا په داسې حال کې ده چې د ۱۴۰۳ کال د لړم په میاشت کې د طالبانو د عدلیې وزیر د ولسي جرګې پخوانی غړی مولوي ترهخېل هم دغه وازار ته ور غوښتی و او بیا یې زنداني کړی وو.
هغه د ځمکو پر غصب تورن و، خو په میاشتو میاشتو د شرعي له لوري زنداني شو، کورونه او ځمکې ترې واخیستې او د کورنۍ غړي یې په وار وار توبې او د بښنې غوښتلو ته مجبور کړ.
دغه راز د همدې کال په کب میاشت کې شرعي په ولسي جرګې کې د لوګر د خلکو استازی حیدرجان نعیم زوی هم ونیوه او څو اونۍ یې بندي او بیا یې بېرته خوشې کړل.
نعیم زوی په وار وار له رسنیو سره په خبرو کې شرعي د شخصي عقدو پر پالوو تورن کړی و.
له هغه وروسته داسې راپورونه هم خپاره شول چې عبدالحکیم شرعي په عدلیې وزارت کې یو شخصي زندان جوړ کړی او خلک په کې په ورځو ورځو ساتل کیږي.
