کابل ټیلیګراف ۹وږی ۱۴۰۴ لمریز کال
ټاکل شوې ده، چې د ملګرو ملتونو امنیت شورا په سپتمبر کې خپله درې میاشتنۍ عمومي غونډه ترسره کړي.
په دغه غونډه کې به د افغانستان د وضعیت په اړه بحث وشي، او ګڼ شمېر نړیوال چارواکي به راپورونه وړاندې کړي.
د یوې خپلواکې تحلیلي ادارې په وینا، د یوناما مشره، روزا اوتونبایوا، د مدني ټولنې استازې او د بشري حقونو لپاره د ملګرو ملتونو د عالي کمیشنر ولکر ترک سره یوځای به په دې غونډه کې راپور ورکړي.
د اوتونبایوا راپور به د سپتمبر په میاشت کې د هغې د ماموریت له پای ته رسېدو دمخه د هغې وروستۍ وینا هم وي.
په دغه ناسته کې د عمومي مشورې وروسته، د نورو جزییاتو په اړه د بحث لپاره خصوصي مشورې هم ټاکل شوې دي.
دی یادونې وړ ده چې د ملګرو ملتونو امنیت شورا د افغانستان په ګډون په بېلابېلو هېوادونو کې د امنیت او بشري حقونو مسلو په اړه د بحث لپاره دوره ای عمومي او خصوصي غونډې کوي.
یوناما دنده لري چې په افغانستان کې د بشري حقونو وضعیت او د سولې پروسې څارنه وکړي او امنیت شورا ته راپور ورکړي.
دا غونډه داسې مهال ترسره کېږي، چې تر دې وړاندې افغانستان کې د روان وضعیت په اړه د یوناما راپورونه دطالبانو له سختو غبرګونونو سره مخ شوي دي.
د نظر خاوندان وايي، د یوناما په تېرو راپورونو کې هم طالبانو ځینې هغه مسایل چې د دوی په ګټه وې منلي او ځینې یې چې دوی په خپل زیان بللې رد کړي دي.
