پاکستان ته د خلیلزاد سپارښتنه؛ د جګړې پر ځای له ټي ټي پي سره خبرې وکړئ
کابل ټیلیګراف د وږي ۲۴مه ۱۴۰۴ لمریز کال
د افغان سولې لپاره د امریکا پخواني استازي، زلمي خلیلزاد د پاکستاني امنیتي ځواکونو او تحریک طالبان پاکستان ترمنځ د نښتو د زیاتوالي په غبرګون کې اسلام آباد ته سپارښتنې ورکړي چې پوځي چلند پریږدي او سیاسي ستراتیژۍ او خبرو اترو ته مخه کړي.
خلیلزاد یکشنبه ناوخته په خپله اېکسپاڼه لیکلي چې د پاکستاني امنیتي ځواکونو او ملکي وګړو درانه تلفات د دې بحران د پای ته رسولو لپاره پوځي حل لارې بې اغیزې ښيي.
نوموړي د پاکستاني مشرتابه کې د ټي ټي پي ګواښ سره د مقابلې لپاره د یوې اغیزمنې ستراتیژۍ په نشتوالي نیوکه کړې او ویلي یې دي چې اسلام آباد باید له خپلې تیرو تجربو څخه زده کړه وکړي.
د خلیلزاد په وینا، پاکستان په تیرو وختونو کې متحده ایالاتو او پخواني افغان حکومت ته مشوره ورکړې وه چې له طالبانو سره خبرې اترې وکړي او اوس د دې وخت دی چې پخپله دا نسخه تعقیب کړي.
نوموړي دا هم وړاندیز کړی چې د ټي ټي پي سره خبرې اترې او د ټي ټي پي سره سیاسي چلند کولی شي د تاوتریخوالي کمولو او دایمي حل موندلو لپاره یوه لاره وي.
زلمي خلیلزاد همدارنګه له طالبانو هم غوښتي چې په دې پروسه کې له پاکستان سره مرسته وکړي.
هغه په دې باور دی چې د ټي ټي پي سره د خبرو اترو د اسانتیا لپاره د طالبانو همکاري کولی شي د تاوتریخوالي کمولو او په سیمه کې د ثبات په راوستلو کې مرسته وکړي.
خلیلزاد داسې مهال پاکستان ته دا سپارښتنې کوي چې، د پاکستان او طالبانو د حکومت ترمنځ اړیکې هم له کړکېچونو ډکې دي.
وړمه ورځ د پاکستان یوه لوړپوړي چارواکي د طالبانو حکومت ته خبرداری ورکړی وو چې، یا پاکستانی حکومت او یا ټي ټي پي د ملګري په حیث وټاکي.
