له کندهار څخه ځايي سرچینې خبر ورکوي چې د دې ولایت په مرکزي ښار او میوند ولسوالۍ کې د دوو تنو جسدونه موندل شوي.
یوه باوري سرچېنه وایي، لومړۍ پېښه نن (دوشنبه، ۱۹ د وږي) سهار وختي شاوخوا پنځه بجې د کندهار ښار اړوند «زاړه ښار» سیمه کې رامنځته شوې او د «سام الدین» په نوم یو ۲۲ کلن ځوان کس وژل شوی دی.
سرچینې زیاتوي چې دا ځوان د نامعلومو کسانو له لوري د «رسۍ او خفه کولو» په واسطه وژل شوی او وروسته یې مړی د کندهار زاړه ښار اړوند په شپږمې ناحیې سیمه کې غورځول شوی.
همداراز کندهار کې ځایي سرچینو ویلي چې د دې ولایت په میوند ولسوالۍ کې د «محبت الله» په نوم د یوه نهه کلن ورک شوي هلک جسد نن غرمه د میوند ولسوالۍ په «کوهک» سیمه کې موندل شوی.
د محبت الله د کورنۍ غړو ویلي د هیڅ چا سره یې شخصي دښمني نه لرله.
په ورته وخت کې د طالبانو ځایي امنیتي مسوولین دواړې پېښي تاییدوي او وايي چې د سام الدین په نوم کس د شخصي دښمنۍ له کبله وژل شوی.
