د ایران د بهرنیو چارو وزیر عباس عراقچي او د سعودي عربستان د بهرنیو چارو وزیر فیصل بن فرحان په غزه او لبنان کې د جګړې سملاسي پای ته رسېدو غوښتنه کړې ده.
د دواړو هېوادونو د بهرنیو چارو وزیرانو چهارشنبه د اکټوبر پر ۹مه د سعودي عربستان په پلازمېنه ریاض کې د لیدنې پرمهال له غزې او لبنان سره د بېړنیو مرستو پر اړتیا ټینګار کړی دی.
عباس عراقچي همداراز په سیاسي، امنیتي او اقتصادي برخو کې د تهران او ریاض د اړیکو د پیاوړتیا غوښتنه کړې ده.
د ایران د بهرنیو چارو وزیر نن سهار سعودي عربستان ته سفر وکړ او د خپل سفر موخه یې د منځني ختیځ په ځانګړي ډول د غزې او لبنان پر حالاتو خبرې اترې یاده کړې وه.
عراقچي تېره اوونۍ لبنان او سوریې ته سفر کړی و.
ټاکل شوې چې سبا قطر ته سفر وکړي.
