کابل ټيليګراف (د مرغومې ۱۷مه– ۱۴۰۳ لمريز)
په کندهار کې د کورنیو تولیداتو او لاسي صنایعو د ملاتړ او ودې په موخه نندارتون جوړ شوی چې څلور ورځې به دوام وکړي.
د افغانستان د صنایعو او کانونو خونې مشر شېرباز کمینزاده وايي، دې نندارتون کې بېلابېل کورني تولیدات او لاسي صنایع په ۶۰ غرفو کې نندارې ته کېښودل شوي دي.
هغه د دغه نندارتون له جوړېدو موخه د تولیدي شرکتونو ترمنځ همغږي او پېردونکو ته د کورنیو تولیداتو ښودل دي.
د نوموړي په وینا چې افغانستان تر بل هر وخت اوس د داخلي تولیداتو پرمټ ځان بساینې ته نږدې شوی دی او دې برخه کې یې هڅې لا ګړندۍ کړي دي.
بلخوا د نندارتون ګډونوال او صنعتکاران د دا ډول نندارتونو جوړیدل مهم بولي او پر دوام یې ټینګار کوي.
