کابل ټيليګراف، کب ۲۰ – ۱۴۰۳ لمريزکال
د کاناډا هېواد د مرکزي بانک پخوانی رییس مارک کارني د دغه هېواد د لومړي وزیر په توګه وټاکل شو.
شاوخوا دوه میاشتې وروسته له هغه چې جاستین ترودو د کاناډا د واکمن ګوند له مشرۍ استعفا اعلان کړه.
د راپورونو له مخې، د کاناډا د لیبرال ګوند د نوي مشر د ټاکلو لپاره رایاچونه چې څو ورځې وړاندې پیل شوې وه، پرون (یکشنبه، د کب ۱۹مه) پای ته ورسېده، او ۵۹ کلن مارک کارني د شاوخوا ۸۶ سلنه رایو په ترلاسه کولو سره د واکمن ګوند مشري ترلاسه کړه.
کارني په خپله وینا کې ویلي چې کاناډا به خپلې متقابلې تعرفې تر هغه وخته وساتي، څو چې امریکایان د درناوی ونه کړي، او ژمنه یې کړې چې د ډونالډ ټرمپ سره په سوداګریز جنګ کې به بریا ترلاسه کړي.
