کابل ټیلیګراف – ۱۶ غبرګولي ۱۴۰۴ لمریز کال
غزني کې د طالبانو امنیه قومانداني وایي، د دغه ولایت د اندړو ولسوالۍ په مربوطاتو کې د یوې ترافیکي پېښې له امله د یوې کورنۍ دوو غړو ژوند له لاسه ورکړی او یو بل ټپي شوی دی.
د غزني د امنیه قوماندانۍ په خبرپاڼه کې راغلي چې دغه پېښه تېره ورځ د کابل – کندهار پر لویه لار د اندړو ولسوالۍ اړوند ملا نوح بابا سیمه کې د یوه امبولانس او پاسو موټرو د ټکر له امله رامنځته شوې ده.
سرچينې لیکلي چې په دغه پېښه کې د یوې کورنۍ دوو غړو ژوند له لاسه ورکړی او یو بل یې ټپی دی.
امنیه قوماندانۍ لیکلي چې ټپي کس لومړۍ د غزني حوزوي روغتون او وروسته بیا د لا ښې درملنې په موخه کابل ته لېږدول شوی دی.
