کابل ټیلیګراف – ۷ زمری ۱۴۰۴ لمریز کال
د عراق د کورنيو چارو وزارت دغه هېواد ته د مجردو افغان ځوانانو د ورتګ باندې بندیز لګولی دی.
د چنګاښ په ۳۱مه د عراق د کورنيو چارو وزارت د دغه هېواد د نجف هوايي ډګر ته يو مکتوب لېږلی چې په کې يې د عراق د سترې محکمې د پرېکړې له مخې، د هغو افغان مجرد ځوانانو د ورتګ د مخنيوي پرېکړه کړې چې په زیارتي کاروانونو کې عراق ته ورځي.
د معلوماتو له مخې، نجف او کربلا ته په زیارتي سفرونو کې تلونکي افغان ځوانان د کار په لټه ورځي او کله چې يې د زیارت د سفر موده پای ته رسېږي دوی په دغه هېواد کې پټېږي.
هر کال زرګونه افغان شیعه ګان د نجف او کربلا د زیارت او اربعین په خاطر باندې چې د شیعه مذهبو ځانګړي مراسم دي، په دغو کې دګډون لپاره عراق ته په زیارتي سفرونو کې ځي.
