کابل ټیلیګراف – ۳ وږی ۱۴۰۴ لمریزی کال
د افغانستان لپاره د امریکا پخواني ځانګړي استازي زلمي خلیلزاد د افغانستان انټرنیشنل ټلویزیون په اړه نیوکې کړې دي. هغه پرون په ټولنیزو رسنیو کې لیکلي چې دا ټلویزیون ښايي د پاکستان د استخباراتو ادارې (ISI) له خوا ملاتړ کېږي.
خلیلزاد پوښتنه کړې: «ایا افغانستان انټرنیشنل ټلویزیون د پاکستان د ISI له لوري تمویلېږي؟ ولې دغه رسنۍ دومره اندېښمنه ده چې ما افغانان له اسلاماباد کې د یوې غونډې له ګډون څخه منع کړل، کومه غونډه چې د ISI اړوند یوه بنسټ جوړ کړی و؟»
هغه زیاته کړې چې د افغانستان انټرنیشنل د “رسنۍ” حیثیت تر پوښتنې لاندې دی، او ښايي خپله د یوې استخباراتي شبکې د فعالیتونو برخه وي.
افغانستان انټرنیشنل تر دې دمه د خلیلزاد د څرګندونو په تړاو رسمي غبرګون نه دی ښودلی.
