کابل ټیلیګراف ۸وږی ۱۴۰۴ لمریز کال
نورستان کې د طالبانو د کانونو او پټرولیم ریاست مسوولین په دغه ولایت کې یو ځل بیا د بولۍ له لارې د قیمتي او نیمه قیمتي ډبرو (بیروج) د پلور خبر ورکړی دی.
په یاد ولایت کې د طالبانو د کانونو او پټرولیم رئیس مولوي سید الرحیم عمير وايي، چې په برګمټال ولسوالۍ کې د ازادې بولۍ له لارې د ١٤٢ میلیونه ٧٠٠ زره افغانیو په ارزښت ٨٠ کیلو ګرامه د بیروج ډبرې وپلورل شوې.
د نوموړي په وینا، د یادې بولۍ له لارې به د دولت خزانې ته ١٤ میلیونه ٢٧٠ زره افغانۍ عواید جمع شي.
دغه راز په یوه بل خبر کې بیا مولوي سید الرحیم عمير وايي، چې په کامدېش ولسوالۍ کې د ازادې بولۍ له لارې د ٥٤ میلیونه ٥٥ زره افغانیو په ارزښت ١٢٤ کیلو ګرامه د بیروج ډبرې وپلورل شوې.
د نوموړي په وینا، د یادې بولۍ له لارې به د دولت خزانې ته ٥ میلیونه ٤٠٠ زره افغانۍ عواید جمع شي.
افغانستان له قیمتي او نیمه قیمتي ډبرو ډک هېواد بلل کېږي خو نیوکې دا دي، چې د وخت حاکمو نظامونو کې د فساد له امله پر دې کانونو چور تالان ګډ وي او په مسلکي ډول نه کیندل کېږي.
