کابل ټیلیګراف ۸وږی ۱۴۰۴ لمریز کال
د پاکستان بهرنیو چارو وزیر اسحاق ډار ویلي،بېجېنګ له افغانستان سره د چین- پاکستان د اقتصادي دهلېز پراختیا لپاره هوکړه کړې ده.
د اسحق ډار په وینا، دغه هوکړه د اسلام اباد، کابل او بېجېنګ تر منځ د درې اړخیزو خبرو یوه برخه وه چې اوس یې جزییات د وروستي کېدو په حال کې دي.
اسحاق ډار پرون د جمعې په ورځ په یوې خبري غونډه کې دا څرګندونې کړې دي.
هغه ویلي، چې په دې هوکړې سره به افغانستان د پاکستان- افغانستان- ازبکستان د اوسپنې پټلۍ د تازه پروژو تر څنګ د سیمې له ترانزیتي شبکو سره هم ونښلول شي.
ډار دغه راز ټينګار وکړ، چې په دې طرحې سره به د افغانستان سوداګري او بنسټیزې پروژې پراختیا ومومي او ورسره به امنیتي همکارۍ لاپسې غښتلې شي.
هغه په ډاګه کړه، چې د افغان کډوالو د ستنولو او پر کرښه د تګ راتګ د مدیریت په تړاو بحثونه هم په لومړیتوبونو کې دي او په وینا یې پاکستان هیله مند دی چې د چین په ملاتړ د دواړو هېوادونو سوداګریزې او ترانزیتي اړیکې ښې شي.
د چین او پاکستان اقتصادي کوریدور یا «سي پېک» د چین د «یو کمربند – یوه لاره» د طرحې مهمه برخه ده چې چارې یې په ۲۰۱۵ کال کې پيل شوي او تر اوسه یې ډېر کار په پاکستان کې شوی دی.
د معلوماتو له مخې که چېرې دغه طرحه وروستۍ او بشپړه شي، نو کابل به د چین د سیمه ییز اتصال تر ټولو لویې طرحې سره ونښلول شي.
