کابل ټیلیګراف ۸وږی ۱۴۰۴ لمریز کال
د طالبانو د عدلیې وزارت ویلي، د مشاعرو د تنظیم قانون یې د مشرتابه له توشېح وروسته رسمي جریده کې خپور شو.
دغه قانون تمهید، مقدمه، درې بابونه، دوه فصلونه او ۱۳ مادې لري او د اطلاعات او فرهنګ وزارت یې د تطبیق مرجع ده.
د قانون پر بنسټ شاعران د مشاعرې له غونډې څخه مخکې او د هغې په جریان کې مکلف دي چې اسلامي شعایرو ته له سپکاوي، د قومونو، ژبو او مسلمانانو له تحقیر او تفریق، د غیر اسلامي اخلاقو او ناروا دودونو، د انجونو او هلکانو ستاینه یا له دوی سره دوستۍ ته له دعوتولو او د طالبان د امیر هیبت الله د فرامینو، حکمونو او پرېکړو له نقد کولو څخه په جدي توګه ډډه وکړي.
دغه راز قانون شاعران مکلف کړي چې د خپلو اشعارو په محتوا کې اسلامي اخلاق، شرعي سیاست، د نفس تزکیه، د اسلامي عقیدې تحکیم، د امت وحدت او اسلامي غوښتنو ته بلنه په پام کې ونیسي او شعر یې باید له ناروا خواهشاتو او بېځایه احساساتو څخه خالي اوسي.
دا په داسې حال کې ده، چې د عدلیې وزارت چارواکو تر دې وړاندې خبر ورکړی و، چې نورو برخو لپاره هم قانون جوړیږي څو چارې یې په مټ په ښه ډول ترسره شي.
