کابل ټیلیګراف د تلې ۵مه ۱۴۰۴ لمریز کال
د طالبانو ملي دفاع وزارت خبر ورکړی، چې د لوی پامیر سړک تر رغېدو وروسته به د یادې سیمې قرغیز اوسېدونکو ته ښارګوټی هم جوړ کړي.
د پامیر اوسېدونکي وایي، د سړک او ښارګوټي په جوړېدو سره به یې ډېر ستونزې حل شي.
دا لومړی ځل دی چې، حکومت د پامیر اوسېدونکو د راټولېدو او یو ځای ژوند کولو برخه کې اقدام کوي.
لوی پامیر د هېواد له لرې پرتو او تر ټولو لوړه سیمه ده.
د مالوماتو له مخې دا مهال د یادې سیمې اوسېدونکي تر ټولو سختو شرایطو کې ژوند کوي.
د افغانستان په شمال ختیځ کې د واخان ولسوالي د هېواد یوه هېره شوې سیمه ګڼل کېږي. د واخان ولسوالۍ د کوچني او لوي پامیر سیمې د بدخشان ترټولو لیرې پرتې سیمې دي.
