د اسلامي همکاریو سازمان په افغانستان کې د طالبانو له حکومته غوښتي، چې د ښځو او نجونو پر وړاندې د زدهکړو او کار د بندیز پر پرېکړو دې بیا کتنه وکړي.
د دغه سازمان د عمومي منشي مرستیال او د افغانستان لپاره ځانګړي استازي طارق علي بخیت دغه غوښتنه پرون پنجشنبه ناوخته د (اګست ۲۹مه) د اسلامي همکاریو سازمان د بهرنيو چارو وزیرانو د ۵۰مې غونډې په څنډه کې د طالبانو د حکومت د بهرنیو چارو وزارت د سرپرست وزیر امیرخان متقي سره د لیدنې پر مهال کړې ده.
د اسلامي همکاریو د سازمان له لوري د یاد سازمان په ایکسپاڼه کې په خپور شوي بیان کې راغلي، پهدې لیدنه کې د بهرنیو چارو وزیرانو د پرېکړهلیکونو د تطبیق پر څرنګوالي سربېره د ترهګرۍ، مخدره توکو او د افغانستان پر اقتصادي او بشري وضعیت هم خبرې شوي دي.
که څه هم د کامیرون په پلازمېنه یاوندي کې د اسلامي همکاریو سازمان د بهرنيو چارو وزیرانو د عمومي غونډې په لومړۍ ورځ د افغانستان په اړه یاده ونهشوه، خو تمه کېږي چې نن (د اګسټ ۳۰مه) د غونډې په دوهمې او وروستۍ ورځ د افغانستان اړوند مسایلو باندې بحثونه وشي.
د یادونې ده، چې د دغې غونډې د پیل په مراسمو کې د ګډ رسمي انځور د اخيستلو پر مهال د طالبانو د حکومت د بهرنیو چارو سرپرست امیرخان متقي ته د ګډون د اجازې د نه ورکړې په اړه هم راپورونه خپاره شوي دي.
