د طالبانو د دفاع وزير مولوي يعقوب مجاهد خپلو د ټولنيزو شبکو فعالانو، وياندويانو او پلويانو سره په ليدنه کې هغوی ته ويلي، نظام يې له پراخ تبليغاتي هجوم سره مخ دی او سپارښتنه يې کړې، چې بايد لا ډېر فعال شي.
د طالبانو د کورنيو چارو وزارت وياند عبدالمتين قانع ليکلي، دغه غونډه د مخکښو ليکوالانو او مشرتابه ترمنځ د همکارۍ، مهمو مشورو، نظرونو او معلوماتو شريکولو په موخه جوړه شوې وه: «ښاغلي مجاهد د مسلمانانو فکري تنوير يو مهم کار وباله او هغوی يې په فکري برخه کې د خلکو خدمت او د اسلامي نظام په ملاتړ لا زيات کار ته وهڅول.»
نوموړي ليکلي، ځينو برخوالو د ټولو ګډونوالو په نمايندګۍ خبرې وکړې، جوړه شوې غونډه يې ګټوره وبلله او په امنيتي او تصفیوي برخه کې يې مشرتابه ته با ارزښته مشورې وړاندې کړې.
