کابل ټيليګراف (د مرغومي ۷مه – ۱۴۰۳ لمريز)
چارواکي وایي، د کابل ـ جلال اباد پر لویه لاره د لغمان مربوطاتو کې د دوو ترافیکي پېښو له امله ۵ تنه مړه شوي او ۷ نور ټپیان دي.
د لغمان د امنیه قوماندانۍ ویاند یونس یوسفزي ویلي، لومړۍ پېښه د کابل ـ جلال اباد پر لویه لاره د قرغیو په سیمه کې نن سهار ۸ نیمې بجې د فرونر او فېلدر موټر د ټکر له امله رامنځته شوې، چې په کې درې تنه مړه او یو بل ټپي شوی دی.
په ورته مهال سرچینې وايي، تیره ورځ د کابل ـ جلال اباد لویه لارې اړوند مشعل کمر سیمه کې د ترافیکي پېښې له امله دوه تنه مړه او پنځه نور ټپیان شوي دي.
دا په داسې حال کې ده، چې د لغمان ترافیکو مدیریت ویلي وو، چې د کابل ـ جلال اباد پر لویه لاره یې د ترافیکي پېښو د کمولو په موخه مهم اقدامات ترسره کړي.
