کابل ټيليګراف (د مرغومي ۷مه – ۱۴۰۳ لمريز)
را پورونه وایي، تر لس زرو زیات کډوال د سمندر له لارې هسپانیې ته د رسیدو په هڅه کې مړه شوي، چې له همدې امله د تیر کال په پرتله د پناه غوښتونکو د مړینې په کچه کې ۵۸ سلنه زیاتوالی راغلی.
د هسپانیې د کډوالو د حقونو یوه بنسټ د یادو څرګندونو په کولو سره د مړو شویو کسانو د هویت په اړه ډیر وضاحت ندی ورکړی، خو ویلي: هره ورځ په یاده لاره تر دیرش تنو پناه غوښتونکې ژوند بایلي.
کامینډو فرونټراس سازمان ویلي: په مړو شویو کې یو زرو او ۳۸ ماشومان او ۴۲۱ ښځې شاملې دي او همداراز د پناهغوښتونکو د ډوبېدو ډېرې پېښې د روان کال په اپرېل او مې میاشتو کې شوې دي.
د هسپانیې د کورنیو چارو وزارت هم خبر ورکړی، چې دغه هېواد ته په کښتیو کې د کډوالو ورتګ کې د تیر کال په پرتله ۱۲ سلنه زیاتوالی راغلی.
هغه زیاته کړې، د روان کال ډېسمبر تر ۱۵مې پورې یاد هېواد ۵۷ زره او ۷۰۰ پناهغوښتونکي د کښتیو په وسیله ورغلي دي.
