کابل ټيليګراف (د مرغومې ۱۶مه– ۱۴۰۳ لمريز)
ایراني چارواکي وایي، د دغه هېواد په روغتونونو کې ۷ سوه افغان ډاکټران په خدمت بوخت دي.
د دغه هېواد د کورنیو چارو وزارت د بهرنیو اتباع او کډوالو چارو د مرکز مشر نادر یار احمدي ویلي، په ایران کې نږدې ۷ سوه افغان ډاکټران د تخصص او فوق تخصص په برخه کې په روغتونونو کې خدمات ترسره کوي.
ایلنا خبري اژانس د را پور له مخې؛ یاراحمدي د دغو احصایو د اعلانولو پر مهال وویل، دا د خلکو لپاره ښه خبره ده چې له دې مسلې خبر شي.
د ایران د کورنیو چارو د وزارت د بهرنیو اتباعو او کډوالو د چارو د مرکز مشر ویلي دي چې دا کسان د هغو افغانانو له ډلې څخه دي، چې په تیرو کلونو کې د ایران له حکومت څخه د کارتونو په ترلاسه کولو بریالي شوي چې پر اساس یې دوی ته خدمات هم وړاندې کیږي.
ایراني چارواکي د افغان اسنادو لرونکي کډوال ” اتباع مجاز” بولي او له اسنادو پرته کډوال “غیر مجاز” بولي.
