( کابل ټيليګراف (کب ۱۲ – ۱۴۰۳ لمريزکال )
د پاکستان روغتیايي چارواکو د سند ایالت د تاتا په سیمه کې د پولیو د یوې بلې مثبتې پېښې د ثبت خبر ورکړی، چې په دې سره روان میلادي کال کې په دې هېواد کې د پولیو د مثبتو پېښو شمېر شپږو ته ورسید.
تېر کال په پاکستان کې د دې ناروغۍ ۷۴ مثبتې پېښې ثبت شوې وې، چې ډېری یې د بلوچستان، سند او خیبر پښتونخوا په ایالتونو کې وې.
په همدې حال کې، په ټول پاکستان کې د پولیو ضد واکسین کمپاین پیل شوی دی.
افغانستان او پاکستان په نړۍ کې یوازیني هېوادونه دي چې لا هم په کې د پولیو ویروس په بشپړه توګه له منځه ندی وړل شوی.
