کابل ټيليګراف (د مرغومې ۲۵مه– ۱۴۰۳ لمريز)
په کابل کې د پاکستان پخواني سفیر منصور احمد خان ویلي، اسلامآباد ونه توانېد چې طالبان دې ته قانع کړي، چې د ترهګرو ډلو په ځانګړې توګه د پاکستاني طالبانو تحریک پر وړاندې اقدام وکړي.
نوموړي ټینګار کړی چې پاکستان باید د تېرو څو لسیزو امنیتي تګلاره بدله کړي.
منصور احمد خان د دوشنبې په ورځ د پاکستانۍ «ډان» ورځپاڼې لپاره په یوه مقاله کې لیکلي چې اسلام آباد د ترهګرو ډلو د مخینوي په برخه کې د طالبانو په قانع کولو کې ناکام شوی او دغې ناکامۍ د دواړو لوریو ترمنځ اړیکې ترینګلې کړي دي.
احمد خان ویلي، درې نیم کاله وروسته له هغې چې طالبان واک ته رسېدلي، د اسلام اباد هغه تمې پوره نه شوې چې دغه حکومت به د ټي ټي پي، داعش او بلوڅ بېلتون پالو په ګډون ترهګریزې ډلې وځپي.
هغه دا رنګه لیکلي، ټي ټي پي د افغان طالبانو سره د اړیکو له امله په افغانستان کې شته او پر پاکستاني امنیتي ځواکونو بریدونه یې هم زیات کړي دي.
احمد خان همدارنګه لیکلي، د اسلام اباد او افغان طالبانو ترمنځ اړیکې خرابې شوې دي او دا حالت د دواړو لوریو ترمنځ د “ناکامه تعامل” پایله ده.
هغه د پاکستان له خوا د ویزو، کډوالو، سوداګرۍ او ټرانزیټ په برخه کې د فشار تاکتیکونه “بېګټې” بللي دي.
