کابل ټيليګراف (سلواغې ۸مه– ۱۴۰۳ لمريز
د پاکستان د بلوچستان ایالت په خضدار سيمه کې د ملکي خلکو په يو بس موټر باندې چاودنه شوې چې له امله يې يو کس وژل شوی او ۷ نور ټپيان دي.
ځايي مسوولین وايي چاودېدونکي توکي په يو الټو ډوله موټر کې ځای پرځای شوي وو.
د خضدار د سیمې يو امنيتي مسوول ياسر دشتي رسنيو ته ويلي چې د مسافر وړونکو دغه بس له بلوچستان څخه د پنجاب راولپنډۍ سیمې ته پر لاره و چې دغې سیمې کې پرې چاودنه وشوه.
تر اوسه کومې وسله والې ډلې د دغه برید مسولیت نه دی منلی؛ خو ډېر کله په بلوچستان کې دا ډول بریدونه د بلوڅ بېلتون غوښتونکو وسله والو له لوري ترسره کېږي.
