( کابل ټيليګراف (کب ۱۲ – ۱۴۰۳ لمريزکال )
د طالبانو د کرنې، اوبو لګولو او مالدارۍ وزارت وايي چې د افغانستان په شپاړسو ولایتونو کې د صنعتي پارکونو د جوړولو لپاره د دغه ډلې د صنعت او سوداګرۍ وزارت ته د ځمکې د لیږد پروسه پیل شوې.
ویل کیږي چې د هیواد په هر ولایت کې د صنعتي پارکونو د جوړولو لپاره زر جریبه ځمکه ځانګړې شوې ده، ترڅو په هېواد کې د صنعت د پراختیا لپاره وکارول شي.
د طالبانو د صنعت او سوداګرۍ وزارت ویلي چې د ملا هیبت الله اخوندزاده په امر یې، په ټول هیواد کې د صنعتي پارکونو د جوړولو لپاره یو سل او شپیته زره جریبه ځمکه ځانګړې کړې او صنعتکارانو ته به وویشل شي.
مخکې له دې، هبت الله اخندزاده د صنعتي سیمو قانون لاسلیک کړی و.
دا قانون د افغانستان د اقتصاد د ودې، د صنعتي زونونو د تنظیم، د خصوصي پانګونې د راجلبولو، او د دې سیمو د مدیریت او ساتنې په موخه رامینځته شوی دی.
د افغانستان د صنعت او کانونو خونه ټینګار کوي چې د ځمکې ویش او د انرژۍ رسولو د صنعتکارانو اساسي اړتیاوې دي او باید ژر تر ژره پیل شي.
