( کابل ټيليګراف (کب ۵ – ۱۴۰۳ لمريزکال )
د طالبانو تر کنټرول لاندې د افغانستان بانک رئیس د ازبکستان د مرکزي بانک له مشر سره په لېدنه کې د بانکي لیږدونو په برخه کې د اسانتیاوو رامنځته کولو او د ظرفیت لوړونې په اړه خبرې کړي دي.
د طالبانو تر کنټرول لاندې د افغانستان بانک رئیس، ښاغلي نور احمد آغا د ازبکستان د مرکزي بانک له رئیس ښاغلي تیمور اشمتوف سره لیدلي.
د یاد بانک په خبرپاڼه کې راغلي چې په دې لیدنه کې دواړو لوریو د دوه اړخیزو همکاریو د پراختیا، د بانکي لیږدونو په برخه کې د اسانتیاوو رامنځته کولو، د ظرفیت لوړونې، په سوداګریزو راکړو ورکړو کې د دواړو هېوادونو د ملي پولي واحدونو پر کارونې او د اداینزو سیستمونو د نښلونې او پراختیا په اړه مفصل بحثونه وکړل.
نور احمد آغا ویلي چې د ازبکستان هېواد سره د بانکوالۍ برخې پراختیا کولای شي د سوداګریزو اړیکو د لا غوړېدو سبب شي. هغه ویلي، د افغانستان بانک ژمن دی چې د نړۍ له ټولو هېوادونو سره د بانکي سکتور په برخه کې رغنډه اړیکې ولري او په دې وسیله د افغانستان د بانکي سکتور په برخه کې په ملي او نړیواله کچه اړینې آسانتیاوې رامنځته کړي.
د ازبکستان هېواد د مرکزي بانک رئیس تیمور اشمتوف هم له خپله اړخه د پوره همکارۍ ډاډ ورکړی دی.
