کابل ټيلیګراف – ۲۴ چنګاښ ۱۴۰۴ لمریز کال
اووه افغان کډوال، چې درې ښځې او څلور نارینه پکې شامل دي، د فرانسې د تبعیدیانو پارلمان ته نوماند شوي دي.
شکیبا داوود، سیاره رحماني او فاطمه حیدري د ښځو او روحالله صدیقالله، انعامالله سمون، واصل اسحاقزی او مهدي موعودي د نارینهوو په منځ کې نوماندان دي.
اوسمهال د بېلابېلو هېوادونو ۲۵ نوماندان په دې سیالۍ کې برخه لري، چې له ایران، سوریې، روسیې، فلسطین، ترکیې، تونس، الجزایرو، د کانګو دموکراتیک جمهوریت او نورو هېوادونو څخه دي.
یوازې هغه کسان چې په فرانسه کې د کډوالۍ وضعیت لري، کولای شي د فرانسې د تبعیدیانو پارلمان رسمي ویبسایټ ته په ورتګ سره په انلاین توګه رایه ورکړي.
هر رایه ورکوونکی کولای شي یوې ښځینه او یو نارینه نوماند ته رایه ورکړي.
رایې ورکول د جمعې تر ورځې، د سرطان ۲۷مې (د جولای ۱۸مه) پورې دوام لري او پایلې به احتمالاً یوه ورځ وروسته اعلان شي.
د فرانسې د تبعیدیانو پارلمان (Le Parlement des Exilés) یو مدني او غیرحکومتي بنسټ دی چې د سیاسي، ټولنیزو یا امنیتي دلایلو له امله له خپلو هېوادونو څخه د وتلو کسانو د حضور، مشارکت او غږ د بیان لپاره جوړ شوی دی.
دا بنسټ هڅه کوي د کډوالو، مهاجرو او تبعیدیانو حقونه، اندېښنې او غوښتنې په ملي کچه مطرح او د دوی غږ د فرانسې دولتي او پرېکړهکوونکو بنسټونو ته ورسوي.
