کابل ټيلیګراف – ۲۵ چنګاښ ۱۴۰۴ لمریز کال
د هغې پراخې معلوماتي افشاګرۍ وروسته، چې د بریتانوي ځواکونو سره د نږدې ۱۰۰ زرو افغان همکارانو ژوند یې له خطر سره مخ کړی و، د بریتانیا حکومت زرګونه کسان په پټه دې هیواد ته انتقال کړي دي.
د بریتانوي رسنیو د راپورونو له مخې، دا افشاګري د ۲۰۲۲ کال پورې اړه لري، خو د یوه فوقالعاده محرمانه قضایي حکم له لغوه کېدو وروسته اوس خپره شوې ده.
د راپور له مخې، یوه بریتانوي سرتېري د پناه غوښتنې د غوښتنلیکونو د ارزونې پر مهال په غیر ارادي توګه د لسګونو زرو کسانو نومونه خپاره کړي وو.
د دې معلوماتو یوه برخه شاوخوا یو کال وروسته په فیسبوک خپره شوه، چې دا کار د دې اندېښنو لامل شو چې طالبانو کیدای شي دا معلومات د «قتل لست» د جوړولو لپاره کارولي وي.
په دې پېښې وروسته، د بریتانیا حکومت د ۸۵۰ میلیون پونډو یو پروګرام پیل کړ ترڅو زرګونه افغانان په پټه دې هیواد ته انتقال کړي.
د ټایمز ورځپاڼې په وینا، د بریتانیا بېلابېلو حکومتونو د دې موضوع د پټولو لپاره میلیارډونه پونډه لګولي دي.
ویل شوي چې د بریتانیا د دفاع وزیر جان هیلي به ډېر ژر د دې موضوع په اړه پارلمان ته یو راپور وړاندې کړي.
