کابل ټیلیګراف – ۳ زمری ۱۴۰۴ لمریز کال
د پاکستان د بهرنیو چارو وزارت ویاند شفقات علي خان د طالبانو د حکومت د احتمالي رسمیت پېژندلو په اړه راپورونه اټکلونه بللي دي.
هغه د پنجشنبې په ورځ خپلې اوونیزې خبري غونډې کې وویل چې په افغانستان کې د ترهګرو پټنځایونه لا هم د پاکستان لپاره د دوامداره اندیښنې سرچینه ده.
شفقت علي خان زیاته کړې چې د پاکستان د بهرنیو چارو وزارت او طالبانو ترمنځ اسلام اباد ته د امیرخان متقي د سفر پروګرام نهایي کولو لپاره مشورې روانې دي.
د هغه په وینا، د طالبانو د حکومت د رسمي پېژندلو په اړه د رسنیو راپورونه ژر تر ژره او پر اټکلونو ولاړ دي.
د پاکستان د بهرنیو چارو وزارت ویاند همدارنګه وویل چې په ۳۰ جون د ثبت شویو افغان کډوالو د بېرته ستنېدو موده پای ته رسېدلې او تر اوسه تمدید شوې نه ده.
هغه وویل: «د تمدید وړاندیزونه دولت ته وړاندې شوي، خو تر اوسه کومه پرېکړه نه ده شوې. د دې موضوع په اړه وروستۍ پرېکړه د کورنیو چارو وزارت او اړوندو دولتي ادارو په غاړه ده.»
خان کابل ته د پاکستان د کورنیو چارو وزیر وروستي سفر ته په اشارې سره وویل چې دا سفر خورا مهم و.
د هغه په وینا، د دې سفر په ترڅ کې، د پاکستان او طالبانو چارواکو د امنیت او ترهګرۍ پر وړاندې د مبارزې په اړه، په ځانګړي توګه د تحریک طالبان پاکستان (TTP) او نورو وسلهوالو د سپارلو په اړه مفصلې خبرې اترې وکړې.
هغه وویل چې د طالبانو مشرتابه د پاکستان اندیښنو ته مثبت ځواب ورکړی او امنیتي خبرې اترې په تخنیکي کچه روانې دي.
