کاپیسا کې د طالبانو امنیه قومانداني وايي، دوه ځوانان چې له کابله دغه ولایت ته د تفریح لپاره ورغلي وو، د صیاد پل مربوطاتو کې په سیند کې د لامبو وهلو پر مهال ډوب شوي او ژوند یې له لاسه ورکړی دی.
د کاپیسا د امنیې قوماندانۍ ویاند عبدالفتاح فایز پژواک ویلي یاده پېښه د جمعې ورځ وروسته له غرمې شاوخوا درې بجې او دېرش دقیقې شوې ده.
د هغه په وینا، د پېښې قربانان ۲۲ کلن نصیرالله او ۲۱ کلن ساجد د کاپیسا د مرکز د نواباد سیمې اصلي اوسېدونکي وو او اوسمهال په کابل کې اوسېدل.
فایز زیاته کړه چې د یادو دوو ځوانانو جسدونه د پولیسو او د ځايي خلکو په مرسته له اوبو را ایستل شوي او کورنیو ته یې وسپارل شوي دي.
هغه ټینګار وکړ، هغو کورنیو او ځوانانو ته چې دغه ولایت ته د تفریح لپاره ورځي، سپارښتنه شوې چې له لامبو وهلو ډډه وکړي.
د یادونې ده، دا په روان کال کې په کاپیسا کې د لامبو پر مهال د ځوانانو د ډوبېدو څلورمه پېښه ده.
