کابل ټیلیګراف د وږي ۱۱مه ۱۴۰۴ لمریز کال
په غزه د اسرائیلو تازه بریدونو کې د یوې حامله میرمنې په ګډون لس فلسطینیان وژل شوي دي.
د راپورونو له مخې، په هغه کور کې چې د اسرائیلي پوځ له خوا په نښه شوی و، د خونې څخه د ماشومانو لوبو او جامې وموندل شوې، چې احتمالاً دې ښځې د خپل راتلونکي ماشوم لپاره چمتو کړې وې.
د اسرائیلي پوځ په لاسونو یوازې په یوه ورځ کې له ۱۰۰ زیات فلسطینیانو په وژلو سره په غزه کې د شهیدانو ټوله شمېره ۶۳,۵۵۷ ته ورسېده، په داسې حال کې چې ۱۶۰,۶۶۰ کسان ټپیان شوي دي.
په غزه کې د قحطۍ حالت هم لا پای ته نه دی رسېدلی، او د لوږې شدت له امله نور ۹ فلسطینیان مړه شوي دي.
د فلسطین د روغتیا وزارت په وینا، د اسرائیلي بمباریو له امله لا هم په سړکونو کې د ودانیو کنډوالو لاندې ګڼ شمېر کسان بند پاتې دي، او د اسرائیلي پوځ له خوا د ژغورنې کارکوونکو ته د کنډوالو لیرې کولو اجازه نه ورکول کېږي.
