کابل ټیلیګراف د وږي ۲۹مه ۱۴۰۴ لمریز کال
د پاکستان د بلوچستان ایالت اړوند د موټرو تمځای کې د بمي چاودنې له امله شپږ کسان وژل شوي دي.
پېښه د بلوچستان په چمن سیمه کې رامنځته شوې ده.
ځايي چارواکو رسنیو ته ویلي چې پنځه کسان د چاودنې له امله ځای پر ځای وژل شوي او یوه کس په روغتون کې سا ورکړې ده.
وژل شوي دوه تنه د چمن اوسېدونکي دي.
چارواکي وايي د چاودنې څرنګوالی لامعلوم نه دی او په تړاو یې پلټنې روانې دي.
په ورته مهال د بلوچستان د کورنیو چارو وزارت پېښه غندلې او ویلي یې دي چې عاملین به ژر ونیول شي.
تر اوسه چا یا کومې وسلهوالې ډلې د دې برید مسوولیت نه دی منلی. په بلوچستان کې وسلوالې ډلې وخت ناوخت پر حکومتي ودانیو، پوځ او پولیسو بریدونه کوي.
په دې وروستیو کې دغو بریدو سخت زور اخیستی.
