طالبان د تېلو دوه لویې ساحې داوطلبۍ ته وړاندې کوي

کابل ټیلیګراف د تلې لومړۍ نېټه ۱۴۰۴ لمریز کال

د طالبانو د کانونو او پټرولیم وزارت اعلان کړی چې د هلمند او کټواز د تېلو دوه لویې ساحې به سږکال داوطلبۍ ته وړاندې شي ترڅو د افغانستان د تېلو ځینې اړتیاوې پوره کړي.

د طالبانو د کانونو او تېلو وزارت ویاند همایون افغان  ويلي چې د کټواز حوزه، چې شاوخوا ۴۰،۰۰۰ کیلومتره مربع  مساحت لري، او د هلمند د تېلو حوزه، چې ۱۰۰،۰۰۰ کیلومتره مربع مساحت لري، په افغانستان کې د تېلو دوه مهمې حوزې دي.

هغه زیاته کړه: ((د کانونو وزارت تېر کال د دې دوو سیمو هوایي او مقناطیسي سروې بشپړه کړه، او د دې دوو سیمو تخنیکي اسناد بشپړ شوي او د دوی لپاره بودیجه ځانګړې شوې ده. موږ هیله لرو چې سږکال به داوطلبۍ ته وړاندې شي.))

همایون افغان ټینګار وکړ چې د منځنۍ اسیا هیوادونه د افغانستان د تیلو او ګازو په ساحو کې پانګونې ته لیوالتیا لري او دا به د افغانستان د انرژۍ سکتور ته وده ورکړي.

نوموړی وايي: ((زموږ یو له لومړیتوبونو څخه دا دی چې په تیلو او ګازو باندې جدي کار وکړو ترڅو موږ وکولی شو د تیلو او ګازو په سکتور کې د افغانستان اړتیاوې پوره کړو.))

افغانستان پنځه لوی د تیلو ساحې لري، آمو سیند، افغان تاجک، هرات، کټواز او هلمند. اوس مهال، طالبان یوازې د آمو سیند له حوزې څخه تیل استخراجوي.

طالبانو مخکې د آمو سیند د تیلو د حوزې د استخراج قرارداد د ۲۵ کلن تړون په چوکاټ کې د چینایي شرکت افچین سره کړی و.

دغه شرکت د ۲۰۲۳ کال په نومبر کې د تیلو استخراج پیل کړ، خو نږدې دوه کاله وروسته، طالبانو له شرکت سره قرارداد لغوه کړ. د طالبانو د کانونو او تیلو وزارت اعلان وکړ چې افچین د وزارت معیارونه نقض کړي او خپلې ژمنې یې نه دي پوره کړي.

خو طالبانو د دې سرغړونو په اړه جزئیات نه دي خپاره کړي او یوازې یې د قرارداد لغوه کولو اعلان کړی دی.

یوه اونۍ وړاندې، د طالبانو د کانونو او تېلو وزیر، هدایت الله بدري د افغانستان شمالي ولایتونو ته سفر وکړ او د آمو سیند د تېلو حوزې په قشقري سیمه کې یې د کار د پرمختګ څېړنه وکړه. د طالبانو د کانونو او تېلو وزارت په یوه اعلامیه کې ویل شوي چې هدایت الله بدري د کېندل شویو څاګانو او د تېلو زیرمو معاینه وکړه. هغه ټینګار وکړ چې د چینایانو له وتلو وروسته، افغان کارپوهانو د دې نفتو د ساحې د استخراج او نورو چارو مسؤلیت په غاړه اخیستی دی، او کارونه (په سمه توګه) روان دي.

سره له دې چې د آمو سیند له حوزې څخه د تیلو استخراج دوام لري، د دې سیمې څخه د طالبانو عاید ناڅرګند پاتې دی، او دا ډله د خپل عاید جزئیات نه افشا کوي.

څلور کاله وروسته له هغه چې طالبانو په افغانستان کنټرول ترلاسه کړ، دا ډله د کانونو او ځمکې لاندې سرچینو لپاره د قراردادونو د ترلاسه کولو لپاره سخت کار کوي. د مالي بحران له امله، طالبان هڅه کوي چې د کانونو د زیاتولو له لارې خپل ځینې لګښتونه پوره کړي.

د طالبانو رژیم هڅه کوي چې د خپلو عایداتي سرچینو په پراخولو سره د خپل حکومت بنسټونه پیاوړي کړي. د دې عاید یوه د پام وړ برخه په ایډیالوژیکي روزنه، د جوماتونو او دیني مدرسو په جوړولو او پراختیا، او همدارنګه په پوځي فعالیتونو مصرفیږي.

اوس مهال، یوازې روسیه د طالبانو رژیم په رسمیت پیژني. طالبان نه کورنی او نه هم نړیوال مشروعیت لري. سربیره پردې، که چیرې د طالبانو رژیم یوه ورځ سقوط وکړي، نو په افغانستان کې د کانونو او د ځمکې لاندې سرچینو ټول قراردادونه چې له بهرنیو هیوادونو سره لاسلیک شوي دي د پلي کیدو تضمین به ونلري.