د افغانستان کرکټ بورډ د لوبغاړو د غوراوي کمېټې د شپږیزې کرکټ لیګ سیالیو لپاره پنځې لوبډلې اعلان کړې.
دا سیالۍ به د زمري پر ۲۲مه پېل او د وږي پر ۴مه پای ته ورسېږي.
د لوبغاړو غوراوي کمېټې د پرېکړې پر بنسټ، راشدخان د سپینغر پړانګانو، حشمتالله شاهدي د بند امیر ښامارانو، ابراهیم ځدراڼ د مېس عینک اتلانو، رحمتشاه د بُست ساتونکو او عظمتالله عمرزی د امو نهنګانو لوبډلمشران ټاکل شوي دي.
دا سترې سیالۍ به ۱۴ ورځې دوام وکړي چې هره لوبډله به په لومړي پړاو کې اته لوبې کوي او په ټوله کې له ۲۰ لوبو وروسته د دوو مخکښو لوبډلو ترمنځ پای لوبه ترسره کېږي.
په دې لیګ کې به د هېواد ملي لوبغاړو تر څنګ د کورني کرېکټ لسګونه نور لوبغاړي هم ولوبېږي.
د شپږیزې کرېکټ لیګ لومړی پړاو لوبې په ۲۰۱۳م کال کې پېل شوې او سږکال یې د نهم پړاو لوبې په کابل کرېکت لوبغالي کې ترسره کېږي.
د یادونې ده چې له نوموړي لیګ وروسته به د زونونو په کچه، احمدشاه ابدالي فرسټ کلاس او د درېیم پړاو زرغون افغانستان جام لوبې هم ترسره شي.
